司機押注 Uber 失利？70 萬買 Tesla 載客

Uber 最受爭議的 UberBlack 高級橋車服務，近日多番受警方打壓。有 Uber 司機透露，早前被 Uber 的廣告吸引，聲稱月入可達 6 萬，決定搏一搏，用 70 餘萬出架 Tesla 電動車載客，但未夠 3 個月就可能無得撈！

Tesla 三年回購計劃吸引

不願透露名字的 Uber 司機（化名 Ken）向 ezone.hk 記者表示，本身做 Sales 月入約 2.5 萬，見 Uber 廣告吸引，而且又是國際大公司，所以決定辭職玩！

▲ Uber 在求職網站貼出，司機月入可達 6 萬！(相片來源：ezone.hk)

Ken 有朋友專登買豐田 Alphard、日產 Elgrand 等 7 人車做 UberBlack，不過油費成本好貴，所以幾個月前把心一橫買架 Tesla 電動車做 UberBlack，貪去充電站充電不用錢！

車價雖然 70 幾萬，但 Tesla 其實有提供回購，3 年之後就可以用 7 折價錢退回廠，即是 20 幾萬可以玩 3 年，平均每月 $8,000 左右，架車又型又不用付油費，用來做 Uber 起初真係賺到笑！

▲ Tesla 以 High-Tech、High-Class 作賣點，純電動更令油費開支大減。(相片來源：ezone.hk)

點樣賺到笑？

▲ Uber 近日力推 Tesla 服務，收費比 UberBlack 更高。(相片來源：ezone.hk)

Ken 同 ezone.hk 記者計一計，他指基本上每星期可接到 80 個 Order 以上，收入大約有 $10,000 左右，但未扣油費！當平均每個客車程 15 公里，如果用 7 人車要成 $3 一公里，80 客 x 15 公里 x $3 等於 $3,600，用 Tesla 除充電時間外，油費 Cost 係 $0，即係每月袋多人 $14,400！ 

▲ 有 Uber 司機貼出圖片，顯示每周收入逾 $12,000，當中未扣除油費及已墊支的隧道費、橋費。(相片來源：ezone.hk)

警放蛇接單倍小心

但警方蛇捉拘捕 UberBlack 司機，未領有商用車輛牌照及保險的 Ken，近日提心吊膽。雖然 Uber 指會有律師支援，但扣人扣車，都會令屋企人擔心，所以他有時揀客做，亦會取消訂單。

節錄於ezone.hk

更多科技潮流資訊，盡在 ezone.hk